وائل غنيم يطالب السيسي بالاعتذار لزوجة مرسي ويثير دهشة المصريين

وقال غنيم: "أنا في الظروف دي، وأنتم كلكم قلقانين، وشايفين إني مجنون، عاوز أشكر أمي، لأنها اللي علمتني أحترم الناس، وأحترم كرامتي... أنا لما سافرت بره مصر ماطلعتش أهزأ نفسي، ولما خرجت مارضتش أشتم، رغم إني كنت قاعد في ماونتن فيو... واتصلت بعبد الله بن زايد، وزير خارجية الإمارات، وشتمته، وها يزعل إني قلت كده بس عادي... عاوزين تقتلوني اقتلوني، أنا خلاص ماليش آخر".

وأضاف غنيم: "أنا تعبت منكم كلكم، وشايف إننا لازم نهدى بقى... ويا محمد علي (صاحب شركة المقاولات الذي فضح وقائع الفساد داخل الجيش) اتلم، وبطل عيب، أنت جاي عايز فلوس"، مستطرداً "اليوم بداية جديدة بالنسبة لي، وأنا كويس، ومسامح نفسي في كل حاجة... وبالنسبة لموضوع الشعر، كل واحد خايف الناس تحكم عليه، وأنا النهارده مش خايف حد يحكم عليا... أنا اللي جوة قلبي كويس، ونفسي عبد الفتاح السيسي يبقى كويس، ونفسي مصر تبقى كويسة".

وتابع: "نفسي الناس اللي في السجن تخرج منه، ونفسي أم عبد الله (زوجة الرئيس الراحل محمد مرسي)، اللي زوجها اتحبس، وبعدين مات، ثم ابنها مات تهدى... الست دي بتتعذب أد إيه دلوقتي، وحاسة بإيه عشان إحنا كلنا ما بقاش عندنا دم... فبدل ما تهتموا بيا، وبشكلي، أنا كويس على فكرة، وهادي، بصوا على الست اللي جوزها كان رئيس مصر، واترمى مات، وبعدين ابنها مات... الست دي مكسورة دلوقتي".

وزاد غنيم: "لو يا سيسي عندك دم، روح حب على إيد الست دي، وورينا فعلاً إن عندك دم، وإن أمك ربتك... غير كده أنت أمك ماربتكش، لأنك وجعت الست دي، وضريتها، وفي الآخر أمك ماعلمتكش... لو أنت أمك حية، لازم تقولك اللي أنت بتعمله ده غلط، أنا مش هاشتمك لأنك راجل جواه خير، وأنا عارف... بس لو سمحت حب على إيد الست دي، وقولها إن أنت آسف!".