شريف منير: "لسنا السبب في هزيمة مصر أمام روسيا"!

المباراة انتهت بخسارة الفراعنة بثلاثة أهداف مقابل هدف، تواصلت بعدها حملة الهجوم على الوفد الموجود حالياً في روسيا على نفقة شركة مملوكة للدولة اعترفت بذلك بنفسها لتكشف كذب ادعاءات من قال إنه سافر على نفقته الخاصة.

وقال شريف منير - الذي سبق له القول إنه لم يتقاض مليماً واحداً في حملات التبرعات للأعمال الخيرية - في مقطع فيديو بثه عبر "فيسبوك": "ذهبنا إلى روسيا لتلبية دعوة بهدف دعم المنتخب المصري، والدعوة شملت الطيران والإقامة مثل دعوات المشاركة في المهرجانات السينمائية، ولم نتلق أية مكافآت".

وتابع: "بالعكس تكلفنا بعض المصروفات.. كل ده عشان الفريق خسر، فإحنا نتحمل الموضوع يعني، هو إحنا اللي حطينا خطة اللعب؟ هو إحنا اللي لعبنا وخسرنا؟ إحنا كنا واقفين وبنتفاعل جوه الملعب زي كل المصريين الموجودين، وزعلنا لما اتغلبنا.. الكورة كده؛ مكسب وخسارة، إيه الغلط اللي عملناه؟ ويتقال علينا مطبلاتية ورقاصين وألفاظ مش كويسة، هو إحنا مش بنمتعكوا برضه؟ إيه الغلط اللي عملناه؟ هي مش فيفي عبده اللي أنا شاركت معاها في مسرحية حزمني كنتوا بتنبسطوا منها؟".

وأضاف منير: "إحنا ذنبنا إيه؟ إحنا رايحين ندعم المنتخب، حطوا نفسكو مكاننا، ولو أنت مكاننا وجت لك دعوة لحضور الماتش، بصرف النظر مين اللي طالع معاك، مش هتطلع؟ أكيد هتطلع .. اتقال علينا كلام كبير، وإن إحنا طالعين من قوت الشعب، مش حقيقي الكلام ده، ده بند من الدعاية للشركة".

وقال: "يشرفنا إننا ندعم المنتخب، أقسم بالله إحنا ما نعرف اللاعيبة في أوتيل إيه، ولا شوفناهم أساسا..الكلام جارح جدًا، معملناش حاجة مشينة، لو كنا كسبنا كنتو شيلتونا فوق الدماغ، أنا حقيقي انجرحت وزعلت، إحنا لما بنروح والله ما بناخد مقابل، وأقسم بالله مرة تانية إحنا ما شوفنا اللاعبية ولا نعرف مكان إقامتهم..".

وقال في رسالته: "إحنا قدمنا لكم كتير، واستمتعتم بأعمالنا، مفيش داعي تجرحوحنا أكتر من كده، ماتزعلوش مننا إحنا معملناش حاجة وحشة، وأقول للاعيبة هارد لك، هي الكورة كده، كل الفرق بتخسر.. من باب أولى إننا نهاجم المصريين اللي فرحانين في هزيمة منتخبنا، في ناس بيهاجموا فريقنا وبيفرحوا فيه، وقالوا علينا يا رب الطيارة تقع بينا وكإننا خونة، أنا آسف على الإطالة والانفعال، وفي الآخر أفوض أمري إلى الله إن الله بصير بالعباد".