حدوتة العشق والأرض

الأولة وصلِك
والتانية ترحالِك
والتالتة أصلِك
عجبك خلاص حالِك
والرابعة إنسي
والخامسة أنسالِك
والسادسة إقسي
واستكتري سؤالِك
والسابعة المكتوب
مضروب على رمالِك
تعودي يا قمح القلوب
لجدورك وسلسالِك

*****

الأولة وصلِك
قدري ومكتوبِك
كسرتي ليه وزنِك؟
شقيتي ليه توبِك؟
إكمني مجذوبِك!
بتحدفيني طوب
لو بدك التوبة
بزيادة مش راح أتوب
أنا اللي دبت دوب
يا دوب بموت فيكي
لو قد عمري قلوب
مش راح أكفيكي
مربوط في خطاويكي
يا أم الخطا دوار
عايزاني أفرط فيكي
وارضى لروحي العار؟
طب كيف يا قدري أعيش
لو موتّي جوايا
حكم الهوى غلاب
على الكل إلايا
ياللي انتي نساية
أنا لسه مش نساي
كان ليا فيكي الماضي
وبكرة ليا الجاي

*****

عاشق وتوتة وناي
وحدوتة مالها زي
وعمر ناقص سكر
وموتة ناقصة شاي

*****

والتانية ترحالِك
ويا قليل الأصل
وصلتي دياب الطبع
والديب ما يعرف وصل
لا دمه من دمك يا شفيقة
ولا طينته من أرضك
ولا عمره صام خماسينك
ولا ركع فرضك
ولا نفخ عينك
لما طرفها الزمن
بالبخس باع عرضك
والعرض مر التمن
ومن غريب لغريب
عسلك بيتصفى
ولا عاد حرام ولا عيب
ولا وزن للكفة
وأم الخلول تتشفى
وتعصر لباس العفة
ومع كل حاكم جديد
نعيد تاني اللفة
مين اللي كسر الدفة
وخلى مركبك عوجة
مع كل هبة ريح
تمشي في ريح الموجة
وتجوعي يا حرة
وتاكلي بنهودِك
وتسافري بلاد برة
تتأصعي بعودِك
وتدوسي على خدودِك
بكعبك العالي
وتوطي بسجودِك
لكل باب عالي
والجوف يبات خالي
والمر ما يحلاش
بعتي اللبن بالعفن
باعك عفن ببلاش

*****

والتالتة أصلِك
عجبك خلاص حالِك
رضيتي بالتغريب
وتوب الغريب هالِك
والزرعة لما تخيب
ما يبكيها غير مالِك
والدمعة لما تسيب
ما يمسحها غير شالِك
وانتي يا جوزة الطيب
يا مطاوعة عزالِك
داويتي علة وشيب
وتعبتي حمالِك
لكن مسير الغيب
يردك لمنوالِك
يطير الحمام ويغيب
ويعاود تاني لغيتة
وابو زيد وياللعجب
بيلف مع ساقيته
ورغم الجفاف والجدب
مبديكي على سقيته
لساه بيسقي جدورِك
يا بعيدة مش شايفاه
وليلاتي يروح يزورِك
في خياله يا ولداه
مين ده اللي يرضى شقاه؟
إلا لو عاشق
والواد صبحه مساه
وسهم الهوى راشق
وانتي يا متغربة
وسارحة في ملكوتِك
غرك رحيق الصبا
لما استوى توتِك
بكرة تدور الرحايا
ويطحنك الطريق
والوردة يدبل ربيعها
ويتصفى الرحيق
ومين هايصلب طولِك
لما يبان أتبِك؟
هو اللي زارع فطورِك
وصاين حدود عتبِك
هو اللي كتبك بدمه
قدر على جبينه
والعار جدار فاصل
واصل بينك وبينه
لكنه مش همه
لا خاله ولا عمه
وإن كان وصلك مذلة
يمسح عارها بكمه
وإن كان عشقك حنش
لأجلك يسكر بسمه
وإن كان في حضنك موته
يموت.. مادام هايضمه

*****

والرابعة إنسي
طيرِك وارضِك وناسِك
واتهني بنقوطِك
واستغني عن فاسِك
واتمايلي على قوتِك
واسترزقي بكاسِك
واترقصي بنبوتِك
واتحامي في دياثِك
ياللي انتي كان عودِك
زي الجبل ماسِك
لو تقلوكي دهب
زمان ما يسوى مداسِك
دلوقت صار صوتِك
كومة رماد طافي
إيه لازمة القوافي؟
والكلمة مش من راسِك!
إنسي قطننا ولطعه
وحطبه ومواكبه
واللعب عند الساقية
والقمح ومراكبه
إنسي ديارنا
وحضنها لبعضها من البرد
إنسي قمرنا
وإنسي الربابة والسرد
إنسي العزء والحرت
والطرف في السيالة
إنسي الدراس والسمس
والرمح في القيالة
وانسي البنات الحجالة
على عتبة المضيفة
وانسي عرق النهار
وانسي ليالي الصفا
والحكمة وضرب المثل
من بطن بلاليص العسل
يا مرحرحة في الكسل
يا سبية العولمة
إيه ده اللي ليكي حصل؟
مش طبعك الخوـــــ
ــجنة!

*****

والخامسة أنسالِك
تكسير مجاديفي
واعيش مع مرسالِك
أسطورة من تخاريفي
ونتواعد
ونتعاتب
وكأني مش في خريفي
وضلي يحضن ضلِك
وطيفك يبوس طيفي
وتسكن جوايا دارنا
وافرشها ولاد وبنات
واكيد بيكي قدرنا
واغنيلك تلات غنوات
غنوة لبعادِك
يا ام الهوى غلاب
وغنوة لميعادِك
يا ام الفؤاد قلاب
وغنوة للحلم
بلاش تصادريها
خليني شبطان فيها
هي الأحلام بحساب؟!

*****

والسادسة إقسي
قسا الحبيب مبلوع
وجرح الحبيب أخرص
حتى لو مسموع
وأنا أصلي راجل فلاح
وليا في المحبة جسور
وعمري ما اكره أرضي
وان كانت بايرة بور
هل في الكون بطون
تكره حبالة الولد
تموت الأم مرضية
بس الجنين يتولد
وانتي الجنين والبطن
والأرض والميلاد
وأنا المصلوب ورا ضهرك
يا ام الرحم ولاد
يا شفيقة على الكل
وعليا زي الصخر
صدري اتنحل من الجفا
والشوق نخرني نخر
أنا اللي بكل فخر
شايل لفيروسِك
أنا دموع نيلِك
لما اتبلى بهكسوسِك
أنا قمحِك اللي اتعطب
في سنين الجدب من سوسِك
أنا حصنك اللي اتنصب
أول ما دق ناقوسِك
أنا سن اتكسر في تروسِك
أنا حكم اتنسخ من دينِك
أنا سهم اترمى من قوسِك
واتنسى في ميادينِك
أنا حفنة من ريحة ترابِك
لسه فيها الروح
تفكرك بشبابِك
وبأجمل ما فيكي تفوح
أنا عمرِك المدبوح
يا شاربة ترياقي
ييجي الغريب ويروح
وأفضل أنا باقي
بدمي
بروحي
بريحة الطمي على جسمي
تحرقيني
تدهسيني
توئديني تحت التراب
هايعيش فوق التراب إسمي

*****

والسابعة المكتوب
مضروب
على رمالِك
تعودي يا قمح القلوب
لجدورك وسلسالِك
وتعود يا طمي النيل
تخصب ضهر وادينا
وتعود يا قطن النيل
وتميل على إيدينا
وتعودي يا جنينة
تملي الديار فرحة
ونعلق الزينة
وتلبسي الطرحة
وتعودي يا شمس الريف
وتطلي من الشباك
عارفِك مهما تغيبي
ندى الغيطان شبَّاك
سماح النوبة دي
وكل نوبة
وإيه في إيدي غير السماح
تحرم عليا التوبة
يا ام الحنين دباح
أروح منك لفين؟
ومني لفين هاتروحي؟
بتتراوح خطاوينا
وتروح روحك في روحي
وتروحي يا تغريبة
ويروح الوبا والصُخرة
ماناقصش غير الطواشي
تتسيد علينا رخرة
هكسوس وفرس وعجم
الكل غنى علينا
والكل انجلى برطمه
وعاشت غناوينا
وعاشت الحدوتة
وطرحت توتة وناي
وعاش العاشق يغنيها
ويحكيها لعيال الحي

*****

عاشق وتوتة وناي
وحدوتة مالها زي
وعمر ناقص سكر
وموتة ناقصة شاي

(مصر)