بث مباشر من غرفة العمليات
عبد الفتاح بعد الإفراج عنه في سبتمبر/أيلول الماضي (أ.ف.ب)
ـ الشعب محتاج مننا خطوات حاسمة وسريعة في موضوع سيناء، اتفضلوا سمعوني اقتراحات عملية.
ـ الأول لازم نفرض حظر تجول.
ـ مفروض من سنة أصلاً يافندم.
ـ نعلن فرضه تاني عشان الناس تعرف إننا مهتمين.
ـ لازم نقطع الاتصالات والانترنت.
ـ مقطوعين معظم الوقت يافندم بس ممكن نقطعهم طول الوقت هما والتليفونات برضه.
ـ كل دي تفاصيل بسيطة، ومش هيحل المشكلة خالص غير اقتراح واحد يافندم، بكره الصبح كل القوات تعمل هجوم شامل على سيناء، زحف كامل يشمل المدرعات والطيارات والمشاة..
ـ حيلك حيلك يا سيادة اللواء، لما انت تقول الكلام ده الناس العاديين اللي مش فاهمين حاجة يقولوا إيه؟ سينا إيه اللي نزحف عليها؟ انت ناسي اتفاقية كامب ديفيد، مش عارف يعني إن عشان نحرك قواتنا الحكاية محتاجة تنسيق مع اسرائيل ومشاورات دولية ووسايط وشغلانة.
ـ سيادتك حتى لو كنا نقدر نعمل هجوم شامل فده مش صح استراتيجيا، الحل في حرب عصابات بقوات خاصة.
ـ بس ده لازم يافندم يتم بمساعدة أهل سيناء نفسهم، والحكاية دي هتاخد وقت عشان نصلح الأخطاء اللي حصلت وتأثيرها على الناس هناك.
ـ ما قدامناش غير إننا نلم كل اللي ساكنين في سيناء ونطلعهم بره سيناء لمدة سنة وبعدما نعمل التنسيق اللازم نقصفها لغاية مانساويها بالأرض، وبعد كده نبنيها تاني.
ـ وهي سينا دي زي عين الصيرة ولا شارع مصدق عشان سكانها يتلموا وقت ماحنا عايزين، ولو فرضنا ولميناهم هنسكنهم فين، في مارينا مثلا بما إنها فاضية اليومين دول، ولا نقعدهم في نوادي الجيش ونصرف على أكلهم وشربهم، وبعدين فرضنا إننا عملنا كده يبقى ننسى اللي فاضل من السياحة، ونستحمل إيرادات قناة السويس تقل النص، لغاية ما نسوي سينا بالأرض ونبنيها تاني.
ـ بس الكلام ده في خبراء وأساتذة قالوه في البرامج والجرايد، لو الكلام غلط يبقى احنا سايبينهم ليه يقولوا كده؟
ـ عشان يعملوا ردع معنوي ويحسسوا الناس بخطورة الأوضاع، إنما في حد نص عاقل ينفذ كلام زي ده، ممكن بقى شوية حلول عملية، إيه ساكتين ليه؟، مش لاقيين حلول، نبعت يعني نجيب شركة فالكون تأمن سيناء زي ما قال الواد أبو لسان زالف علاء عبد الفتاح؟.
ـ مش عارفين نعمل معاه إيه يافندم، أبوه اتقتل وحبسنا أخته الصغيرة، ولا هو ولا أمه ولا أخته التانية ولا خالته عايزين يهمدوا.
ـ أقوله عايز أخلص من الإرهاب في سيناء، يكلمني عن علاء وخالته، إيه ياسيادة اللواء ساكت من بدري ليه؟ أنا قلت إنت اللي هتنجدنا عشان سيناء تخصصك.
ـ بصراحة يافندم أي حلول للإرهاب في سيناء مش هتبقى حلول سريعة، كلها حلول طويلة المدى وما ينفعش تبتدي إلا من جوه سيناء ومن جوه أهلها، في دراسات مقدمة حلول لكل مشاكل سيناء متقدمة من أيام اللواء منير شاش، والملفات دي عمالة تتركن من رئيس للتاني، ولو كانت الحلول اللي فيها اتنفذت من زمان ماكانش ده بقى حالنا.
ـ طويلة المدى إيه بس، باقولك عايز حل عملي سريع يهدي الناس بسرعة، خلاص مافيش حاجة سريعة نقدر نعملها؟
ـ لا يا فندم نقدر نحبس علاء عبد الفتاح.
ـ خلاص.. احبسوا علاء عبد الفتاح.